A.F.A.E.S. noticias

Xornada de portas abertas en AFAES Porta Nova

O día 10 de outubro, coincidindo co Día Mundial da Saúde Mental, en AFAES Porta Nova manteremos unha Xornada de Portas Abertas na sede do Centro de Rehabilitación Psicosocial en Narón. Invitamos a calquera persoa interesada, a visitar os nosos servizos e participar e integrarse nas actividades que se estean realizando.

Carta na que o Presidente da Asociación AFAES Porta Nova, Félix Pena Calvo, proclama o sentir desta celebración para este ano 2011.

O Día Mundial da Saúde Mental é unha xornada importante para as persoas con enfermidade mental e os seus familiares, posto que nos permite dar a coñecer mellor a realidade que vivimos durante todo o ano. Así desde a Asociación de Familiares e Amigos de Persoas con Enfermidade Mental, AFAES PORTA NOVA, queremos celebrar unha vez máis este 10 de outubro como unha oportunidade para reclamar que este tipo de trastornos poidan considerarse como o que son: unha enfermidade máis, que precisa de tratamentos e de apoios si; pero que non debe impedir á persoa que a presenta levar unha vida como calquera outra, nin estar plenamente integrada na sociedade.
A pesar de todos os avances, desde a Asociación de Familiares e Amigos de Persoas con Enfermidade Mental, AFAES PORTA NOVA atopámonos aínda con que o dereito a unha asistencia social e sanitaria parece diluírse cando a enfermidade a tratar é de tipo mental. E mentres, afortunadamente, van desaparecendo as barreiras físicas fronte a outro tipo de discapacidades, mantéñense os prexuízos cos que a sociedade moitas veces exclúe ás persoas diagnosticadas cun trastorno mental.
Por isto no día de hoxe os 140 socios da Asociación de Familiares e Amigos de Persoas con Enfermidade Mental, AFAES PORTA NOVA queremos facerlles chegar o lema elixido para este ano “Afronta o reto: colabora na mellora da saúde mental”. Porque todos -responsables políticos, empresarios, profesionais socio-sanitarios, educadores, ou simplemente como veciños- somos necesarios para cumprir este obxectivo.

Fdo: Félix Pena Calvo
Presidente AFAES PORTA NOVA



Por outra banda, a Confederación Española de Agrupacións de Familiares e Persoas con Enfermidade Mental celebra hoxe, dia 6 de outubro, unha xornada con motivo do Día Mundial da Saúde Mental, que se conmemora en máis de 100 países o 10 de outubro,e na que se tratarán as iniciativas máis novas na atención a este tipo de trastornos.
A xornada terá lugar no Ministerio de Sanidade, Política Social e Igualdade, en Madrid, e contará coa intervención da titular dese Departamento, Leire Pajín.

Modificado o (Xoves, 06 Outubro 2011 11:27)

 

Comunicado de Feafes Galicia

Comunicado de Feafes Galicia en relación a conmemoración do Día Mundial dá Saúde Mental

alt

Feafes Galicia conmemora o Día Mundial da Saúde Mental

As persoas con enfermidade mental e os seus familiares piden que se cumpran e desenvolvan as leis que regulan a atención á saúde mental

4 de outubro de 2011
Feafes Galicia celebrará o vindeiro luns, 10 de outubro, o Día Mundial da Saúde Mental, cunha xornada de portas abertas en Santiago, en colaboración coa Consellería de Sanidade. O acto terá lugar a partir das 10.30 horas, no salón de actos da Consellería. En primeiro lugar intervirán o presidente de Feafes Galicia, Xosé Ramón Girón, e a directora de Asistencia Sanitaria do Servizo Galego de Saúde, María Neves Domínguez. A continuación, José Manuel Oliveirais, do Complexo Hospitalario Universitario de Vigo, realizará unha conferencia sobre a integración de servizos sanitarios en saúde mental. Para rematar, Cristina Losada e Flavio Gutiérrez, tamén do Chuvi, falarán sobre estigma social e autoestigma na esquizofrenia.
Pola tarde, celebrarase un foro vía Internet sobre a saúde mental, organizado pola Escola Galega de Saúde para os Cidadáns. Neste encontro virtual, o presidente de Feafes Galicia e outros expertos responderán ás consultas dos internautas. O foro será de 18 a 20 horas e poderase seguir na web do Sergas.
Baixo o lema ”Afronta o reto: colabora no avance da saúde mental”, o noso colectivo reivindica a erradicación do estigma que padecen as persoas con enfermidade mental e o cumprimento e desenvolvemento das leis relacionadas coa a atención á saúde mental.
Feafes Galicia está integrada por 14 asociacións federadas e ten presenza en 28 concellos galegos. Na nosa comunidade autónoma hai 39.000 persoas con certificado de discapacidade por enfermidade mental, das que case 4.000 son socias de Feafes.
Ata 1986, o coidado das persoas con enfermidade mental recaía na familia, e os casos máis extremos remataban en hospitais psiquiátricos onde o tratamento e a atención chegaban a ser lamentables. Fai 25 anos, a Lei de Sanidade aboliu estes centros, equiparouse a situación á doutros pacientes e decidiuse trasladar a atención das persoas con enfermidade mental ao ámbito comunitario para lograr a súa integración social, sanitaria e laboral. Un cuarto de século despois, a situación é moi deficiente xa que, na práctica, a noticia normativa non tivo unha implantación suficiente e idónea.
Ademáis desta lei, todas as comunidades autónomas aprobaron hai uns anos a "Estratexia en Saúde Mental do Sistema Nacional de Saúde". Pese a todas estas normativas que recollen todos os recursos necesarios para as persoas con enfermidade mental, a rede de atención á saúde mental presenta carencias importancia tanto en Galicia como no resto de España, sobre todo na abordaxe sociosanitaria, a contorna comunitaria e as medidas integrais en aspectos como a formación, a educación, o ámbito laboral, o lecer, o tempo libre ou as familias.
Aínda que o nivel de asistencia sanitaria xeneral en Galicia é o idóneo, no ámbito da saúde mental a atención non é a mesma, xa que os recursos destinados son menores que noutras enfermidades.
Por todo isto, Feafes Galicia considera que é preciso seguir desenvolvendo sistemas de atención á saúde mental. Ademais, consideramos que a situación económica non pode ser escusa para non aplicar medidas e recortar o investimento neste ámbito. A saúde mental é un tema que nos afecta a todos.
Por outra banda, á hora de deseñar e desenvolver políticas sobre saúde mental, fai falta respectar o dereito a que as persoas con algunha enfermidade mental exerzan unha participación activa. Este é un dereito inherente á condición de cidadáns que facilita os procesos de inclusión social.
Co galo do Día Mundial da Saúde Mental, Feafes Galicia reafirmase no seu compromiso, á vez que solicitamos o propio aos gobernos estatal, autonómico e locais, sociedades científicas, organizacións non gubernamentais, institucións académicas, medios de comunicación e a sociedade no seu conxunto. Debemos seguir loitando contra o estigma, defender os dereitos das persoas con enfermidade mental e das súas familias, promover o empoderamento e a recuperación das persoas con problemas de saúde mental e apostar por un modelo comunitario de atención á saúde mental.

FEAFES GALICIA

Galeras, 13, planta 4ª, Of.5 e 6 15705 Santiago de Compostela

Telf.: 981 554 395

Modificado o (Xoves, 06 Outubro 2011 11:39)

 
Máis artigos...
Idiomas
Galician (Galego)Español (spanish formal Internacional)
Acceso



Entidades colaboradoras